„Рош“ доби одобрение за употреба на нов Elecsys NfL тест за откривање на невроинфламација кај мултиплa склероза

• Тестот Elecsys NfL открива невроаксонално оштетување поврзано со невроинфламација кај возрасни пациенти со дијагностицирана релапсно ремитентна мултипла склерозa1

• Овој минимално инвазивен тест им овозможува на пациентите полесно следење на невроинфламаторниот статус во споредба со други стандардни методи

• Преку обезбедување на подобар увид во основната невроинфламаторна активност, Elecsys NfL има потенцијал да овозможи ефикасно следење на мултипла склероза и навремена клиничка интервенцијa2,3

„Рош“ денес објави дека тестот Elecsys® Neurofilament Light Chain (NfL) доби одобрение од Агенцијата за лекови и медицински средства на Република Северна Македонија (МАЛМЕД) за откривање на невроинфламација кај пациенти со дијагностицирана релапсно-ремитентна мултиплa склероза (РРМС). Тестот носи значајна иновација во менаџирање со болеста, нудејќи им на лекарите минимално инвазивен начин за следење на биолошкото оштетување предизвикано од мултиплата склероза. Користејќи едноставен тест за мерење на NfL - протеин што се ослободува за време на повреда на нервните клетки - Elecsys NfL дава слика за невроинфламацијата поврзана со мултипла склероза и кој може да помогне поредовното следење да стане реалност за повеќето лица кои живеат со оваа болест.

Мултипла склероза е хронична болест која зафаќа повеќе од 2,9 милиони лица ширум светот.4 Раното и редовно следење на активноста на болеста е клучно за оптимизирање на третманот, но сепак на некои пациенти може да им биде тешко да пристапат до рутински проценки како што е магнетна резонанца на мозокот (МРИ), што би овозможило навремено откривање на промените во нивната состојба. Тестот Elecsys NfL дава различен вид на увид преку мерење на биолошките маркери на невроаксонално оштетување што ја одразуваат невроинфламацијата. Овие сознанија ги надополнуваат рутинските клинички проценки и МРИ, потенцијално помагајќи во порано и подобро информирано клиничко лекување.

„Ова одобрување означува трансформативен чекор напред во начинот на кој ги поддржуваме возрасните лица со релапсно-ремитентна мултипла склероза“, изјави Мет Сос, извршен директор на „Рош Дијагностика“. „Достапноста на едноставен тест има потенцијал да ја надополни МРИ која бара големи ресурси и има потенцијал да ја подобри грижата за пациентите со РРМС. Тестот Elecsys NfL ќе им помогне на здравствените работници да направат навремена клиничка проценка, овозможувајќи подобро менаџирање на болеста и поперсонализирана грижа за пациентите.“

Тестот Elecsys NfL се изведува на Cobas машина за што е потребен само едноставен примерок од крв и дава стандардизирани и конзистентни резултати.1

За NfL

Лесниот ланец на неврофиламенти (анг. Neurofilament Light Chain, NfL) е изобилен цитоскелетен протеин5 кој се наоѓа речиси исклучиво во невроните6 и е чувствителен индикатор за невроаксонално оштетување2,6. Во нормални услови, NfL се ослободува од аксоните  во ниски нивоа5; сепак, ослободувањето на NfL се зголемува со возраста8 и после невроаксонално оштетување.5 Следствено, абнормално покачени нивоа на NfL може да се измерат во цереброспиналната течност и крвта кај низа акутни и хронични невролошки нарушувања.2,5,7

За Elecsys® NfL

Elecsys NfL на Рош е in vitro квантитативен имунотест за мерење на нивоата на NfL протеинот во серум и плазма. Elecsys NfL е наменет да се користи кај возрасни пациенти со релапсно-ремитентна мултипла склероза со цел да се одреди нивото на невроинфламација.2

 Тестот доби ознака за Врвно откритие од страна на Американската Агенција за храна и лекови (aнг. Food and Drug Agency, FDA) во ноември 2023 година.

За „Рош“ во неврологијата

Неврологијата претставува главен фокус на истражувањата и развојот во „Рош“. Нашата цел е да се стремиме кон револуционерна наука за развој на нови дијагностички методи и лекови кои помагаат да се подобри животот на лицата со хронични и потенцијално онеспособувачки болести низ целиот свет.

 „Рош“ истражува повеќе од десетина лекови за невролошки нарушувања, вклучувајќи мултипла склероза, спинална мускулна атрофија, спектар на нарушување на оптичкиот нерв, Алцхајмерова болест, Хантингтонова болест, Паркинсонова болест и Душенова мускулна дистрофија. „Рош дијагностика“ разви широк спектар на алатки, вклучувајќи дигитални и крвни тестови и анализи на цереброспинална течност, со цел поефикасно откривање, дијагностицирање и следење на невролошките состојби.

 Заедно со нашите партнери, ние сме посветени да ги поместиме границите на научното разбирање за да ги решиме некои од најтешките предизвици во неврологијата денес.

За „Рош“

„Рош“ е здравствена компанија единствена позиционирана да спречува, стопира и лекува болести преку обединување на водечката наука и технологија низ дијагностиката, лековите и дигиталните решенија.

„Рош“ е основана во Базел, Швајцарија во 1896 година и денес е водечки снабдувач на трансформативни лекови и дијагностика за милиони луѓе во над 150 земји низ целиот свет. Таа е посветена на справување со предизвиците во здравствената заштита кои претставуваат најголем товар врз пациентите, семејствата, заедниците и здравствените системи. Преку своите дијагностички и фармацевтски оддели, Рош се фокусира на области како што се онкологија, неврологија, кардиоваскуларни и метаболни болести, офталмологија, заразни болести и имунологија со цел да обезбеди реални и позитивни промени за пациентите, луѓето што ги сакаат и професионалците кои се грижат за нив.

Genentech, во Соединетите Американски Држави, е членка во целосна сопственост на групацијата „Рош“. „Рош“ е мнозински акционер на Chugai Pharmaceuticals, голема иновативна компанија за терапевтски антитела во Јапонија.

За повеќе информации, посетете ја веб страницата www.roche.mk.

Сите заштитени имиња употребени или споменати во ова соопштение се заштитени со закон.

Референци:

1. Roche Diagnostics GmbH. Elecsys NfL. Method Sheet 09880488500 V1.0. Roche Diagnostics GmbH; 2025.

2. Khalil M, et al. Nat Rev Neurol 2018;14:577–89. https://doi.org/10.1038/s41582-018-0058-z.

3. Bar-Or A, et al. EBioMedicine 2023;93:104662. https://doi.org/10.1016/j.ebiom.2023.104662.

4. MS International Federation. Atlas of MS: Number of people with MS. Пристапено: јуни 2026 г. Достапно на: https://atlasofms.org/map/global/epidemiology/number-of-people-with-ms.

5. Gaetani L, et al. J Neurol Neurosurg Psychiatry 2019;90:870–81. https://doi.org/10.1136/jnnp-2018-320106.

6. Gafson AR, et al. Brain 2020;143:1975–98. https://doi.org/10.1093/brain/awaa098.

7. Freedman MS, et al. EBioMedicine 2024;101:104970. https://doi.org/10.1016/j.ebiom.2024.104970.

8. Itorralba J, Schneider R. Pract Neurol (US) 2024;23(2):18–21. https://practicalneurology.com/diseases-diagnoses/ms-immune-disorders/the-prognostic-utility-of-neurofilament-light-chain-in-multiple-sclerosis-a-narrative-review/32098/.